Monthly Archives

January 2020

Kynning frá íbúafundi vegna kynningar á hönnun útivistar- og göngusvæða

By Fréttir

Á opnum íbúafundi í húsnæði Grunnskóla Snæfellsbæjar á Hellissandi þann 30. janúar 2020 voru kynntar tillögur að hönnun útivistar- og göngusvæða á Hellissandi og nærumhverfi.

Elízabet Guðný, landslagsarkitekt hjá Landslag, kynnti tillögur að heildarskipulagi svæðisins sem felur m.a. í sér að núverandi útivistarstígur milli Ólafsvíkur, Rifs og Hellissands verði framlengdur, tvær hugmyndir að hringleið sem tengir útivistarstíg frá strandlínu inn í Hraunskarð og grænum tengingum frá Viðvík í vestri að Tröð og norður með Höskuldsá í gegnum miðju bæjarins til sjávar. Vegir, stígar og trjágróður verði þannig skipulagðir sem eitt svæði með skjólmyndun í huga og fjölgun áningastaða íbúum til bóta.

Fjölmennt var á fundinum og sköpuðust góðar umræður að lokinni kynningu á fyrirliggjandi hönnun. Margar góðar hugmyndir og tillögur bárust frá íbúum sem nýtast Landslagi í áframhaldandi vinnu.

Í viðhengi má sjá þær hugmyndir sem kynntar voru á fundinum. Rétt er að taka fram að þetta er tillaga að heildarskipulagi hönnunar, ekki lokahönnun, en gefur þó góða mynd af þeirri uppbyggingu sem fram undan er á Hellissandi.

Viðhengi:

Heilsuefling eldri borgara í Snæfellsbæ

By Fréttir

Á bæjarstjórnarfundi í gær, fimmtudaginn 30. janúar 2020, samþykkti bæjarstjórn að gera samning við Félag eldri borgara í Snæfellsbæ um aukna heilsueflingu íbúa Snæfellsbæjar eldri en 60 ára.

Samningurinn gerir ráð fyrir að stjórn Félags eldri borgara í Snæfellsbæ geri samning/samninga við líkamsræktarstöðvar sem sjá um sérstaka heilsueflingu eldri borgara, og að fengnum mánaðarlegum reikningi með lista yfir iðkendur þess mánaðar greiðir Snæfellsbær ákveðna upphæð fyrir hvern einstakling í Félagi eldri borgara sem stundar þá heilsueflingu sem í boði er á vegum félagsins. 

Í drögum að þessum samningi er gert ráð fyrir því að framkvæmd heilsueflingarinnar, upplýsingargjöf og hvatning verði alfarið í höndum stjórnar Félags eldri borgara í Snæfellsbæ.

Gert er ráð fyrir því að þetta sé tilraunaverkefni til eins árs og verði endurskoðað í janúar 2021.  Að tilraunatímabilinu loknu mun stjórn Félags eldri borgara upplýsa bæjarstjórn hvernig til tókst, hver ástundunin var og hvaða árangur hafi náðst.

Bæjarstjórn telur mjög mikilvægt að efla lýðheilsu og lífsgæði eldri borgara enn frekar og vonast til að þetta verkefni sé hvatning til þess.

Bæjarstjórnarfundur 30. janúar 2019

By Fréttir

Vakin er athygli á því að 329. fundur bæjarstjórnar Snæfellsbæjar verður haldinn í Ráðhúsi Snæfellsbæjar fimmtudaginn 30. janúar 2020 kl. 16:00.

Fundir bæjarstjórnar eru öllum opnir og eru íbúar hvattir til að kynna sér bæjarmálin. Dagskrá fundar má sjá hér að neðan. Fundarboð má nálgast hér.

Dagskrá fundar:

  1. Fundargerð 133. fundar umhverfis- og skipulagsnefndar, dags. 16. janúar 2020.
  2. Fundargerð vinnufundar menningarnefndar, dags. 30. nóvember 2019.
  3. Fundargerð 105. fundar stjórnar FSS og notendaráðs fatlaðra á Snæfellsnesi, dags. 20. janúar 2020.
  4. Fundargerð 419. fundar stjórnar Hafnasambands Íslands, dags. 20. janúar 2020.
  5. Bréf frá Jensínu Guðmundsdóttur, dags. 28. janúar 2020, varðandi úrsögn úr kjörstjórn Hellissands- og Rifskjördeildar og úr landbúnaðarnefnd.
  6. Bréf frá Ásbirni Óttarsyni, dags. 24. janúar 2020, varðandi ósk um niðurfellingu á leigu í Röst vegna kúttmagakvölds eldri borgara þann 18. janúar sl.
  7. Bréf frá Marinó Mortensen, dags. 9. janúar 2020, varðandi ósk um að bæjarstjórn falli frá forkaupsrétti að bátnum Maríu SH-82, sknr. 6111.
  8. Samþykkt um breytingu á samþykkt um stjórn Snæfellsbæjar.
  9. Endurnýjaður samningur um rekstur Pakkhússins í Ólafsvík.
  10. Bréf frá Heilbrigðisráðuneytinu, dags. 6. nóvember 2019, varðandi svar við ósk Snæfellsbæjar um upplýsingar um nýtingarhlutfall á hjúkrunarrýmum á Vesturlandi.
  11. Bréf frá Sýslumanninum á Vesturlandi, dags. 27. janúar 2020, varðandi ósk um umsögn bæjarstjórnar um umsókn Sigurðar Narfasonar um leyfi til reksturs gististaðar í flokki II, gistiheimili, að Hofgörðum í Staðarsveit, Snæfellsbæ.
  12. Bréf frá Umhverfistofnun, dags. 10. janúar 2020, varðandi endurvinnsluhlutfall heimilisúrgangs í sveitarfélaginu.
  13. Bréf frá Sambandi íslenskra sveitarfélaga, dags. 20. janúar 2020, varðandi boðun á XXXV. landsþing Sambands íslenskra sveitarfélaga.
  14. Bréf frá Sambandi íslenskra sveitarfélaga, dags. 17. janúar 2020, varðandi viðmiðunarreglur um framlög til stjórnmálaflokka.
  15. Bréf frá Húsnæðis- og mannvirkjastofnun, dags. 20. janúar 2020, varðandi húsnæðisáætlanir sveitarfélaga.
  16. Minnispunktar bæjarstjóra.

Snæfellsbæ, 28. janúar 2020
Kristinn Jónasson, bæjarstjóri

Umhverfisstofnun auglýsir eftir landvörðum í tímabundin störf í Þjóðgarðinn Snæfellsjökul

By Fréttir

Umhverfisstofnun auglýsir eftir landvörðum í tímabundin störf í Þjóðgarðinn Snæfellsjökul. Í þjóðgarðinum fer starfsemin fram á utanverðu Snæfellsnesi, á gestastofu á Malarrifi, ströndinni við Stapa, og í Búðahrauni. Gert er ráð fyrir að ráða í þrjú störf sem geta varað í 6-24 vikur en flestir landvarðanna starfa yfir sumartímann. Landverðir hafa búsetu á Malarrifi.

Helstu verkefni og ábyrgð
Störf landvarða felast í að gæta þess að ákvæði náttúruverndarlaga og sérlaga, friðlýsingarskilmála og stjórnunar- og verndaráætlana svæða séu virt. Þeir koma á framfæri upplýsingum og fræða gesti um náttúru og sögu svæðanna, sjá um viðhald innviða og halda við merktum gönguleiðum.
Landverðir þurfa að vera viðbúnir ef slys ber að höndum og er gerð krafa um að þeir sem ráðnir verða til starfa sæki skyndihjálparnámskeið eða hafi gild skyndihjálparréttindi. Boðið verður upp á skyndihjálparnámskeið fyrir landverði í vor.

Hæfnikröfur
– Landvarðanámskeið eða nám sem Umhverfisstofnun telur samsvarandi er krafa
– Reynsla af landvörslustörfum er kostur
– Gild ökuréttindi er krafa
– Góð færni í samskiptum er mikilvæg
– Góð kunnátta í íslensku og ensku er mikilvæg og frekari tungumálakunnátta er kostur
– Þekking á viðkomandi starfssvæði er kostur
– Reynsla af útivist og náttúrutúlkun, skálavörslu, björgunarsveitarstörfum og leiðsöguréttindi eru kostir

Frekari upplýsingar um starfið
Laun samkvæmt gildandi kjarasamningi sem fjármála- og efnahagsráðherra og Verkalýðsfélag Snæfellinga hafa gert.
Bæði konur og karlar eru hvött til að sækja um störfin. 
Umsóknir geta gilt í sex mánuði frá því að umsóknarfrestur rennur út.

Starfshlutfall er 100%
Umsóknarfrestur er til og með 07.02.2020

Nánari upplýsingar veitir
Jón Björnsson – jonb@umhverfisstofnun.is – 5912000
Linda Björk Hallgrímsdóttir – linda.hallgrimsdottir@umhverfisstofnun.is – 5912000

Opinn íbúafundur vegna kynningar á hönnun útivistar- og göngusvæða

By Fréttir

Snæfellsbær boðar til opins íbúafundar vegna kynningar á hönnun útivistar- og göngusvæða á Hellissandi.

Elízabet Guðný Tómasdóttir, landslagsarkitekt, kynnir hönnun frá Landslag ehf.

Fundurinn verður haldinn í húsnæði Grunnskóla Snæfellsbæjar á Hellissandi fimmtudaginn 30. janúar kl. 20:00.

Íbúar eru að sjálfsögðu velkomnir og allir hvattir til að mæta.

Betri Snæfellsbæjar – hugmyndir til framkvæmda árið 2020

By Fréttir

Snæfellsbær opnaði samráðsvettvanginn Betri Snæfellsbæ í vetur og óskaði eftir tillögum um framkvæmdir og viðhaldsverkefni frá íbúum sveitarfélagsins.

Góð þátttaka reyndist meðal íbúa og þegar upp var staðið höfðu borist 45 fjölbreyttar hugmyndir að betri Snæfellsbæ. Tæknideildin fór yfir innsendar tillögur og óskaði eftir því í kjölfarið að bæjarstjórn Snæfellsbæjar gerði ráð fyrir töluverðum fjármunum til verkefnisins í fjárhagsáætlun þessa árs.

Bæjarstjórn samþykkti á fundi sínum þann 5. desember síðastliðinn að veita 18 milljónum til verkefnisins. 

Eftir vinnu tæknideildar við greiningu og forgangsröðun þeirra hugmynda sem bárust verða að lágmarki tólf þeirra framkvæmdar árið 2020 og gert er ráð fyrir að nýta veitt fjármagn að fullu til framkvæmda á þeim. Aðrar hugmyndir geta þó komið til framkvæmda ef tækifæri gefst til og nýtast í skipulagsvinnu hjá Snæfellsbæ næstu árin.

Eftirfarandi hugmyndir verða framkvæmdar:

  • Hundasvæði komið upp við þéttbýliskjarna
  • Afþreying fyrir börn í Rifi bætt
  • Göngustígar við Ólafsbraut í Ólafsvík tengdir saman
  • Vegglistaverk á Hellissandi lýst upp
  • Lýsing bætt við Klifbraut
  • Handrið sett á brú við Hraðfrystihúsið á Hellissandi
  • Grenndargám komið fyrir í dreifbýli
  • Bekkjum verður fjölgað við göngustíga og áningastaði
  • Verndun fuglalífs á Rifi
  • Keflavíkurgata á Hellissandi verður fegruð og lagfærð
  • Útilíkamsræktarstöð, hönnun svæðis
  • Hjólarampur, hönnun svæðis

Nú þegar hefur eitt vegglistaverk á Hellissandi verið lýst upp. 

Hægt er að lesa frekar um fyrirhugaðar framkvæmdir vegna Betri Snæfellsbæjar hér að neðan og í viðhengi efst í frétt. Þar er einnig að finna svör við innsendum hugmyndum íbúa sem koma ekki til framkvæmda að þessu sinni.

Snæfellsbær þakkar fyrir góða þátttöku.

Stofnfundur Matarklasa Snæfellsness

By Fréttir

Fimmtudaginn 23. janúar n.k. verður stofnfundur Matarklasa Snæfellsness haldinn í Bæringsstofu í Grundarfirði. Hefst fundur kl. 15:00 og stendur til 17:00.

Eins og íbúar Snæfellsness vita vel þá er svæðið ríkt frá náttúrunnar hendi þegar kemur að mat og endurspeglast það í starfsemi á svæðinu – hér eru stöndug sjávarútvegsfyrirtæki, blómlegur landbúnaður og hágæða veitingastaðir sem bjóða upp á mat úr héraði. Þessi áhersla á mat kom einnig sterklega í ljós við gerð svæðisskipulags Snæfellsness og í vinnu við Svæðisgarðinn Snæfellsnes. Það er skýr vilji til að matvælaframleiðsla fari fram í beinum og nánum tengslum við náttúruna og með sjálfbæra nýtingu auðlinda að leiðarljósi. M.a. er lögð áhersla á nýsköpun, að aðgengi að snæfellsku hráefni og matvælum aukist og að þekking á matvælaframleiðslu og menningu og hefðum verði efld.

Á sama tíma og markmiðið er að gera Snæfellsnes  að áfangastað fyrir sælkera þá er stefnan að auka aðgengi íbúana að snæfellsku hráefni.

Nú er komið að því að stofna Matarklasa Snæfellsness. Matarklasinn verður vettvangur fyrir samstarf í kringum þessi markmið og einnig tækifæri fyrir hagsmunaaðila að hittast, deila þekkingu og koma fram með hugmyndir um hvernig hægt er að efla og styrkja matartengda starfsemi á svæðinu.

Þannig að ef þú vinnur við frumframleiðslu á mat – hvort sem það er sjávarútvegur eða landbúnaður, rekur veitingastað, mötuneyti eða kaffihús, vinnur við matvælaframleiðslu á einn eða annan hátt, kennslu eða menningatengda starfsemi og/eða hefur mikinn áhuga á þessum málefnum þá endilega komdu á stofnfund matarklasans.

Ef þig vantar frekari upplýsingar ekki hika við að hafa samband: elin@snaefellsnes.is

Dagskrá:

15:00-15:15 Kynning á matarverkefnum Svæðisgarðsins og framtíðarsýn

15:15-16:00 Umræður. Fundargestir fá tækifæri til að hafa áhrif á vinnuna framundan og stefnuna.

16:00-16:20 Kynning á Sælkeraferðum um Snæfellsnes, verkefni styrkt af Matarauði Íslands. Útskýrt verður fyrir hverja þetta verkefnið er ætlað og hvaða leikreglur verða hafðar til hliðsjónar við framkvæmd þessa verkefnis.

16:20- 16:45 Umræða um Sælkeraferðir.

16:45- 17:00 Næstu skref 

Óskað er eftir umsóknum vegna söluvagna fyrir sumarið 2020

By Fréttir

Snæfellsbær óskar eftir umsóknum vegna söluvagna í sveitarfélaginu fyrir sumarið 2020. Umsækjandi um stöðuleyfi söluvagna getur nálgast eyðublað á meðfylgjandi hlekk hér að neðan.

Umsækjendur eru beðnir um að kynna sér samþykkt um götu- og torgsölu. Samþykktina má nálgast á meðfylgjandi hlekk hér að neðan.

Umsóknum skal skilað til Tæknideildar Snæfellsbæjar, Klettsbúð 4, 360 Hellissandi eða á póstfangið: byggingarfulltrui@snb.is fyrir 17. febrúar n.k.

Tæknideild Snæfellsbæjar

Bæjarstjórnarfundur 9. janúar 2020

By Fréttir

Vakin er athygli á því að 328. fundur bæjarstjórnar Snæfellsbæjar verður haldinn í Ráðhúsi Snæfellsbæjar fimmtudaginn 9. janúar 2020 kl. 10:30.

Fundir bæjarstjórnar eru öllum opnir og eru íbúar hvattir til að kynna sér bæjarmálin. Dagskrá fundar má sjá hér að neðan. Fundarboð má nálgast hér.

Dagskrá fundar:

  1. Fundargerðir 188., 189. og 190. fundar menningarnefndar, dags. 15. nóvember, 11. desember og 20. desember 2019.
  2. Fundargerð 132. fundar hafnarstjórnar, dags. 27. desember 2019.
  3. Fundargerð rekstrarnefndar Rastar, dags. 25. nóvember 2019.
  4. Fundargerð 104. fundar stjórnar FSS, dags. 18. desember 2019, ásamt endanlegri fjárhagsáætlun Félags- og skólaþjónustu Snæfellinga fyrir árið 2020.
  5. Fundargerð 418. fundar stjórnar Hafnasambands Íslands, dags. 6. desember 2019.
  6. Fundargerð 877. fundar stjórnar Sambands íslenskra sveitarfélaga, dags. 13. desember 2019.
  7. Bréf frá Heilbrigðiseftirliti Vesturlands, dags. 2. janúar 2020, varðandi framlög sveitarfélaga til HeV á árinu 2020.
  8. Bréf frá Atvinnuvega- og nýsköpunarráðuneytinu, dags. 30. desember 2019, varðandi úthlutun byggðakvóta til byggðarlaga á fiskveiðiárinu 2019/2020.
  9. Bréf frá Vegagerðinni, dags. 9. desember 2019, varðandi niðurfellingu Traðarvegar nr. 5707-01 af vegaskrá.
  10. Bréf frá Félagi heyrnarlausra, dags. 17. desember 2019, varðandi fjárstuðning vegna Táknmálsapps.
  11. Minnispunktar bæjarstjóra.