Monthly Archives

June 2020

Þáttur um Snæfellsbæ í sjónvarpinu í kvöld

By Fréttir

Í kvöld verður fjallað um Snæfellsbæ í sjónvarpsþættinum „Bærinn minn“ á sjónvarpsstöðinni Hringbraut. Þátturinn hefst kl. 21:30 og er í umsjá Sigmundar Ernis Rúnarssonar.

Sigmundur Ernir fer víða í sveitarfélaginu, hittir heimamenn og leggur sérstaka áherslu á að ljúka upp leyndardómum í afþreyingu og upplifun, hvort heldur er í þéttbýliskjörnunum sjálfum eða í náttúrunni í kring, svo og hvernig þjónustu er háttað við ferðamenn. 

Fjöldi viðtala við heimamenn skreytir þáttinn og þeir töfrar sem Snæfellsbær hefur upp á bjóða fyrir ferðalög innanlands í sumar gerð góð skil. Þá er myndvinnsla ríkuleg og hrífandi og náttúrufegurðin sem við búum við leynir sér ekki.

Nú þegar hefur Sigmundur Ernir gert heimsóknum til Fjarðabyggðar, Blönduóss, Akureyrar, Vestmannaeyja og Reykjanesbæjar skil í sambærilegum þáttum og verður þátturinn um Snæfellsbæ sá sjötti og síðasti í þáttaröðinni. 

Þátturinn er á dagskrá á sjónvarpsstöðinni Hringbraut í kvöld kl. 21:30.

Hér má lesa frétt á vefsíðu Hringbrautar um ferðalag Sigmundar Ernis um Snæfellsbæ í síðustu viku.

Vestfjarðavíkingurinn fer fram í Snæfellsbæ um helgina

By Fréttir

Aflraunakeppni milli sterkustu manna landsins, Vestfjarðavíkingurinn, fer fram dagana 4. og 5. júlí 2020 og fara tvær keppnisgreinar fram í Snæfellsbæ.

Á laugardeginum mun heljarmennin sem taka þátt lyfta handlóðum af stærri gerðinni við Sjóminjasafnið á Hellissandi og draga bíla við Pakkhúsið í Ólafsvík á sunnudeginum. Keppnin hefur verið haldin árlega undanfarna áratugi og alla jafna fara einhverjar keppnisgreinar fram í Snæfellsbæ.

Dagskrá Vestfjarðarvíkingsins er hægt að sjá hér að neðan.

Laugardagur 4. júlí

Búðardalur kl. 12:00

Réttstöðulyfta og Steinatök við skólann.

Hellissandur kl. 18:00

Risa handlóð við Sjóminjasafnið á Hellissandi

Sunnudagur 5. júlí

Ólafsvík kl. 12:00

Bíladráttur við Pakkhúsið

Stykkishólmur kl. 17:00

Kast yfir vegg við gömlu kirkjuna og blönduð grein við hafnarvoginn

 

Skógræktarfélag Ólafsvíkur fær aukið landsvæði undir Landgræðsluskóg

By Fréttir

Snæfellsbær og Skógræktarfélag Ólafsvíkur hafa gert með sér samning sem stuðlar að ræktun Landgræðsluskóga á landi Snæfellsbæjar.

Samningurinn er til 75 ára og færir Skógræktarfélagi Ólafsvíkur 39,51 hektara land til að rækta upp, þar af eru 12,19 hektarar skilgreindir á nýju skógræktarsvæði eins og sjá má á meðfylgjandi lóðarblöðum/myndum. Eldri samningur sem gerður var árið 2011 féll úr gildi við undirritun nýja samningsins.

Skógræktarfélag Íslands er aðili að samningnum og leggur til þær plöntur sem Skógræktarfélag Ólafsvíkur gróðursetur á landinu ásamt því að hafa faglega umsjón með verkefninu.

Þess má geta að Landgræðsluskógar eru skógræktar- og uppgræðsluverkefni á vegum skógræktarfélaganna í samstarfi við Landgræðsluna, Skógræktina og umhverfis- og auðlindaráðuneytið. Landgræðsluskógar eru umfangsmesta skógræktar- og uppgræðsluverkefni skógræktarfélaga um allt land.

Hér að neðan má sjá skýringarmyndir af skilgreindu skógræktarsvæði skv. nýjum samningi.

Ljósmynd: Jónatan Garðarsson, formaður Skógræktarfélags Íslands, Vagn Ingólfsson, formaður Skógræktarfélags Ólafsvíkur og Kristinn Jónasson, bæjarstjóri undirrita samninginn sl. laugardag. Alfons Finnsson tók myndina.

Kjörfundir vegna kosninga til embættis forseta Íslands

By Fréttir

Kjörfundir vegna kosninga til embættis forseta Íslands, er fram fara laugardaginn 27. júní 2020, verða á eftirfarandi stöðum í Snæfellsbæ.

Ólafsvíkurkjördeild

  • Kjörfundur verður haldinn í Grunnskólanum í Ólafsvík. Kosning hefst kl. 10:00 og stendur til kl. 22:00

Hellissands- og Rifskjördeild

  • Kjörfundur verður haldinn í Grunnskólanum á Hellissandi. Kosning hefst kl. 10:00 og stendur til kl. 22:00

Staðarsveitar- og Breiðuvíkurkjördeild

  • Kjörfundur verður haldinn í Grunnskólanum á Lýsuhóli. Kosning hefst kl. 11:00 og stendur til kl. 20:00 

Hér geta kjósendur kannað hvort og hvar þeir eru á kjörskrá í kosningum.

Kjörstjórn minnir kjósendur á að hafa skilríki meðferðis á kjörstað.

Ný vatnslögn í Bárðarás á Hellissandi

By Fréttir

Þessa dagana standa yfir framkvæmdir við lagningu nýrrar vatnslagnar í Bárðarás á Hellissandi.

Framkvæmdunum fylgir töluvert umstang og þurfa íbúar að vera viðbúnir aukinni umferð vinnuvéla tímabundið. Verkið verður unnið eins hratt og mögulegt er.

Samra Begic er fjallkona Snæfellsbæjar árið 2020

By Fréttir

Fjallkona Snæfellsbæjar árið 2020 er Samra Begic.

Hún steig á svið við hátíðlega athöfn í Sjómannagarðinum í Ólafsvík í dag og flutti ljóð Einars Benediktssonar, Til fánans, í tilefni af þjóðhátíðardeginum 17. júní.

Rís þú, unga Íslands merki,
upp með þúsund radda brag.
Tengdu í oss að einu verki
anda, kraft og hjartalag,
Rís þú Íslands stóri, sterki
stofn með nýjan frægðardag.

Hvort skal nokkur banna og bjóða
börnum frjálsum þessa lands
og til vorra ættarslóða
augum líta ræningjans?
Fylkjum oss í flokki þjóða.
Fram, að lögum guðs og manns.

Gætum hólmans. Vofi valur
víðskyggn yfir storð og hlé.
Enginn fjörður, enginn dalur
auga hauksins gleymdur sé.
Vakið, vakið, hrund og halur,
heilög geymið Íslands vé.

Storma og ánauð stóðst vor andi
stöðugur sem hamraberg.
Breytinganna straum hann standi
sterkur, nýr á gömlum merg.
Heimur skal hér líta í landi
lifna risa fyrir dverg.

Skín þú, fáni, eynni yfir
eins og mjöll í fjallahlíð.
Fangamerkið fast þú skrifir
fólks í hjartað ár og síð.
Munist hvar sem landinn lifir
litir þína alla tíð.

Hvert eitt landsins fley, sem flýtur,
fáni vor, þig beri hátt.
Hvert þess barn, er ljósið lítur,
lífgar vonir sem þú átt.
Hvert þess líf, sem þverr og þrýtur,
þínum hjúp þú vefja mátt.

Meðan sumarsólir bræða
svellin vetra um engi og tún
skal vor ást til Íslands glæða
afl vort undir krossins rún,
djúp sem blámi himinhæða,
hrein sem jökultindsins brún.

Skógræktarfélag Ólafsvíkur er Snæfellsbæingur ársins 2020

By Fréttir

Við hátíðlega athöfn í Sjómannagarðinum á þjóðhátíðardaginn hlaut Skógræktarfélag Ólafsvíkur nafnbótina Snæfellsbæingur ársins 2020.

Hilmar Már Arason tók við nafnbótinni fyrir hönd Skógræktarfélags Ólafsvíkur.

Það er menningarnefnd Snæfellsbæjar sem hefur veg og vanda af útnefningunni ár hvert. Nefndin óskaði jafnframt eftir tilnefningum frá íbúum sem hún hafði til hliðsjónar við val á Snæfellsbæingi ársins.

Meðfylgjandi er ræða sem Erla Gunnlaugsdóttir, formaður menningarnefndar Snæfellsbæjar, hélt við þetta tilefni:

Góðan dag og gleðilegan þjóðhátíðardag,

Fyrir hönd menningarnefndar vil ég byrja á því að þakka bæjarbúum fyrir þátttöku í vali á Snæfellsbæing ársins sem fram fór á vef Snæfellsbæjar. Bæjarbúar ásamt menningarnefnd hafa valið Skógræktarfélag Ólafsvíkur sem Snæfellsbæing ársins 2020.

Skógræktir í Snæfellsbæ eru til mikillar fyrirmyndar og mikil prýði í okkar samfélagi. Í Ólafsvík hefur mikil vinna verið unnin sl. ár m.a. mikið af trjám verið gróðursett, stígar lagðir, brýr byggðar, borð og bekkir smíðað. Þá er búið að tengja göngustíg við eldri Skógrækt nálægt Rafstöðinni.

Framkvæmdin, undir forystu Vagns Ingólfssonar, er til fyrirmyndar sem unnin hefur verið í sjálfboðavinnu og mun hún nýtast öllum Snæfellsbæingum um ókomna tíð ásamt öllum þeim gestum sem okkur sækja heim.

Innilega til hamingju Skógræktarfélag Ólafsvíkur með nafnbótina og afmælið.

Á þitt fyrirtæki erindi á ferðavef Snæfellsbæjar?

By Fréttir

Snæfellsbær opnaði fyrir skemmstu ferðavef með upplýsingum um ferðaþjónustuaðila í sveitarfélaginu og óskar nú eftir frekari upplýsingum frá ferðaþjónustuaðilum og öðrum þjónustuaðilum til að setja á vefsíðuna.

Helsta markmið með ferðavefnum er að efla stafræna viðveru sveitarfélagsins og bæta aðgengi að upplýsingum um það fjölbreytta þjónustu- og vöruúrval sem er að finna í sveitarfélaginu. Tæpar þrjár vikur eru síðan ferðavefnum var hleypt af stokkunum og hefur hann farið vel af stað.

Til að byrja með var eingöngu upplýsingum um ferðaþjónustuaðila komið fyrir á ferðavefnum en nú er ætlunin að setja jafnframt inn upplýsingar um önnur fyrirtæki sem sinna þjónustu í sveitarfélaginu og eiga erindi á ferðavefinn.

Öll þjónustufyrirtæki eiga erindi á ferðavefinn og eru rekstraraðilar hvattir til að senda inn upplýsingar svo ferðavefurinn gefi skýra mynd af þeirri þjónustu sem hægt er að sækja innan sveitarfélagsins.

Óskað er eftir því að þeir þjónustuaðilar sem vilji vera á ferðavefnum sendi eftirfarandi á netfangið heimir@snb.is:
1. Nafn fyrirtækis,
2. Lýsingu á fyrirtækinu/þjónustunni sem um ræðir,
3. Hlekk á heimasíðu/samfélagsmiðla
4. Nokkrar myndir (ca. 4 -10 stk).

Upplýsingar til íbúa varðandi tökur á sjónvarpsþætti í Ólafsvík

By Fréttir

Í dag, mánudaginn 8. júní, hefur Sagafilm tökur á sjónvarpsþættinum Systrabönd í Ólafsvík. Systrabönd eru glæpaþættir í leikstjórn Silju Hauksdóttur sem fjalla um hvarf þrettán ára stúlku um aldamótin síðustu og þrjár æskuvinkonur sem þurfa að horfast í augu við fortíð sína nítján árum síðar.

Tökur á þættinum munu standa yfir í Ólafsvík næstu dagana og verður tíðindum er varða tökur miðlað hér íbúum til upplýsinga. Einhverjar takmarkanir kunna að verða á umferð um vissar götur rétt á meðan upptökur standa yfir og henni stýrt af tökuliði í samstarfi við lögregluna. Engum götum verður lokað en fólk gæti þurft að hinkra örlítið á meðan tökur standa yfir. Er fólk beðið að sýna því skilning.

Fyrstu tökudagarnir eiga að gerast árið 1995 og er farið þess á leit við íbúa að bílum yngri en ’95 árgerð verði lagt annars staðar á meðan tökur standa yfir.

Fréttin verður uppfærð daglega með upplýsingum um tökustaði.

16. júní

Ólafsvíkurkirkja
  • Upptökur fyrir utan kirkjuna frá kl. 10:30 – 14:15. Það sést á planið hinum megin við gilið. Allt í nútímanum.
Kirkjutún og Ólafsbraut
  • Upptökur frá kl. 14:15 – 16:30 Bílatökur. Ekið niður frá kirkju og eftir Ólafsbraut. Umferð ekki stoppuð, mesta lagi hægt á henni örlítið þar sem líkbíll keyrir um.
Skálholt 17
  • Ein sena fyrir utan húsið. Upptökur frá 17:30 – 18:00.
Ennisbraut 27
  • Ein sena innandyra. Upptökur frá kl. 18:15 – 19:15.
Á Vatnaleið
  • Stutt atriði. Bíll ekur eftir veginum. Upptökur frá kl. 19:50 – 20:15

15. júní

Ólafsvíkurkirkja

  • Tökur innandyra frá kl. 11:00 – 23:00. Ein sena fyrir utan á þessum tíma.

14. júní

Sandholt 30

  • Tökur inni frá kl. 12:00 – 18:00

Skálholt 17

  • Tökur inni frá kl. 18:30 – 00:00. Stuttar tökur fyrir utan hús á sama tímabili.

13. júní

Fyrir utan Ólafsvík (staðsetning óviss)

  • Tökur frá kl. 13:00. Bílasena. Erfitt að áætla staðsetningu.

Ólafsbraut og Grundarbraut

  • Tökur frá 19:45 – 22:00. Bílasenur og fyrir utan Orkuna/Söluskála Ó.K. Það verður ekki lokað.

Mýrarholt 6

  • Tökur utandyra kl. frá kl. 22:00 – 23:00.

Sandholt 34

  • Tökur utandyra kl. frá kl. 23:00 – 00:00.

Ólafsbraut – bílasena

  • Tökur frá kl. 00:00 – 01:00.

11. júní

Erfitt að áætla nákvæmar staðsetningar hér í nokkrum keyrslu senum sem verða í og við Ólafsvík. Ekki þarf að stoppa umferð.

Ólafsvík að Mávahlíð

  • Tökur frá 15:00 – 16:00. Bílasena. Bíll dreginn á öðrum bíl og myndavélar á palli.

Skálholt 17

  • Tökur innan dyra frá kl. 17:00 – 20:30.

Orkan bensínstöð (Söluskáli Ó.K.)

  • Tökur fyrir utan Söluskála Ó.K. frá kl. 20:30 – 22:30. Ekki lokað.

Við Bugsvatn

  • Tökur frá 23:00 – 00:00. Bílasena. Bíll dreginn á öðrum bíl og myndavélar á palli.

Við beygjuna að Jökulhálsi

  • Tökur frá 00:30 – 01:30. Bílasena. Handbremsubeygja frá Útnesvegi að Jökulhálsleið.

10. júní

Strönd við Hrísaárós við veg 54

  • Tökur frá 15:00 – 18:00, leyfi frá landeiganda og vegagerð komið. Umferð verður stjórnað af velmerktum einstaklingum með talstöðvar. Björgunarsveitin þjónustar okkur utanvegar til að auðvelta flutning á búnaði til að vernda svæðið.

Sandholt 34

  • Tökur frá 17:00 – 03:00, allt inni nema ein sena úti og hún er eftir miðnætti.
  • Beiðni um að bílum yngri en ’95 árgerð verði ekki lagt við Sandholt 24-44 eftir kl. 17:00 í dag. 

9. júní

Ennisbraut 27 – eini tökustaður dagsins

  • Tökur standa yfir frá kl. 16:00 – 04:00. Að mestu fara upptökur fram innan dyra en trukkar og aðrir verða í nágrenninu.
  • Eftir miðnætti verða upptökur utandyra.
  • Beiðni um að leggja ekki bílum yngri en ’95 árgerð í nágrenni við húsið þessa nótt.

8. júní

Grundarbraut, Lindarholt og Brúarholt

  • Tökur standa yfir frá kl. 14:00 – 16:30.
  • Beiðni um að leggja ekki bílum yngri en ’95 árgerð við göturnar á meðan tökur standa yfir.

Bæjartún

  • Tökur standa yfir frá 14:30 – 18:00.
  • Umferð verður stýrt í samvinnu við pósthúsið frá kl. 15:30.
  • Beiðni um að leggja ekki bílum yngri en ’95 árgerð við götuna frá kl. 14:30 – 18:00.

Mýrarholt frá Grundarbraut (að beygjunni)

  • Tökur standa yfir frá 16:00 – 00:30.
  • Beiðni um að leggja ekki bílum yngri en ’95 árgerð við götuna frá kl. 14:30 – 18:00.