Covid-19

Íslensk erfðagreining í samstarfi við Heilsugæslustöðina í Ólafsvík býður íbúum Snæfellsbæjar upp á skimun fyrir Covid-19 dagana 6. – 7. maí næstkomandi. Sýnatakan mun fara fram í Félagsheimilinu Röst á Hellissandi og í sjúkraskýli við Heilsugæslustöðina í Ólafsvík frá kl. 13 – 16 á báðum stöðum.

Bókun fer fram með því að skrá sig á linkinn hér fyrir neðan og þá er valið á milli Ólafsvíkur og Hellissands:

https://bokun.rannsokn.is/

Athugið: Engar bókanir munu fara fram í gegnum síma.

—

Islandzka analiza genetyczna oferuje możliwość wykonania badań przesiewowych na Covid-19 które odbędą się w dniach 6 i 7 maja.

Pobieranie próbek odbędzie się w klinice zdrowia HVE w Ólafsvík  przy Engihlið 28 og Félagsheimilið Röst Hellissandur. W miejscu postoju karetek pogotowia , osoby które się zgłoszą muszą przebywać w samochodzie podczas pobierania próbek. Wykonany zostanie wymaz z nosa i gardła.

Rezerwacja odbywa się poprzez rejestrację tutaj:

https://bokun.rannsokn.is/

Uwaga należy zamawiać czas poprzez powyższą stronę. Nie ma możliwości umówienia terminów poprzez rejestrację telefoniczną.

Fyrsta tilslökun á samkomubanni vegna COVID-19 verður á morgun, mánudaginn 4. maí. Þá verður almenna reglan sú að 50 manns mega koma saman í stað 20 áður. Tveggja metra reglan verður áfram í gildi meðal fullorðinna og er mikil áhersla á sóttvarnir og hreinlæti.

Samkomubannið og sóttvarnaráðstafanir hafa eðlilega haft áhrif á starfsemi sveitarfélagsins undanfarnar vikur en með breyttum reglum sem taka gildi á morgun verður hægt að aflétta ákveðnum takmörkunum. Smám saman færist þjónusta bæjarins því til fyrra horfs.

Dvalar- og hjúkrunarheimilið Jaðar

Heimsóknir verða leyfðar inn á heimilið með ákveðnum takmörkunum frá og með 4. maí. Nauðsynlegt verður að takmarka fjölda gesta hverju sinni og sýna þarf ítrustu varkárni og virða sóttvarnaráðstafanir í heimsóknum. Nánar í þessari tilkynningu frá Jaðri.

Leikskóli

Skólastarf fer aftur í eðlilegt horf og börn geta mætt alla daga. Áfram verður þó unnið eftir tilmælum sóttvarnarlæknis og almannavarna og hvatt til sérstaks hreinlætis. Opið hús í lok maí, sem haldið er árlega, verður ekki haldið í ár.

Grunnskóli

Mánudaginn 4. maí hefst skólastarf samkvæmt stundaskrá. Sundkennsla og kennsla í list- og verkgreinum hefjast að nýju, reglur í skólabíl fara í fyrra horf, Skólabær og mötuneytið opna á ný.

Tónlistarskóli

Kennsla í tónlistarskóla verður með óbreyttu sniði en skv. tilmælum frá yfirvöldum verða árlegir vortónleikar ekki haldnir í ár.

Íþróttamannvirki

Íþróttahúsið í Ólafsvík opnar aftur fyrir starfsemi grunnskóla og íþróttastarfsemi barna í leik- og grunnskólum. Æfingar yngri flokka hjá UMF Víking/Reyni hefjast að óbreyttu. Sundlaugin í Ólafsvík verður áfram lokuð.

Skólabíll

Akstur skólabíls hefst aftur skv. áætlun næstkomandi mánudag.

Ærslabelgir

Lofti verður hleypt í ærslabelgina í Ólafsvík og á Hellissandi þann 4. maí. Skv. tilmælum frá almannavörnum verða þeir eingöngu fyrir 16 ára og yngri.

Bókasafn

Bókasafn opnar á mánudaginn og verður opið þrjá daga í viku; mánudag, miðvikudag og fimmtudag. Almennan opnunartíma má nálgast hér.

Félagsstarf eldri borgara í Klifi

Félagsstarf eldri borgara í Klifi á miðvikudögum hefst ekki aftur að svo stöddu.

Tjaldsvæði

Beðið er leiðbeininga varðandi útfærslu á starfsemi tjaldsvæði frá almannavörnum en stefnt er að því að opna tjaldsvæðið í Ólafsvík á næstunni. Vegna framkvæmda á tjaldsvæðinu á Hellissandi opnar það ekki alveg strax.

Ágætu íbúar.

Um páskahelgina bárust þær ánægjulegu fréttir að Covid-19 faraldurinn á Íslandi væri í rénun. Í dag föstudaginn 17. apríl er staðan sú að enginn nýr einstaklingur  hefur verið greindur með Covid-19 í Snæfellsbæ og eitt smit hefur greinst frá því að faraldurinn hófst, það eru líka góðar fréttir. Á Vesturlandi eru nú í einangrun 11 og í sóttkví á Vesturlandi eru nú 37.  Hér á Snæfellsnesi hafa greinst smitaðir 6.

Þrátt fyrir að faraldurinn sé í rénun er ljóst er að samkomubannið í núverandi mynd verður til 4. maí en eftir það taka við nýjar og rýmri reglur. Einhverjum höftum verður aflétt og öðrum breytt.  Það er ljóst að íþróttahús og sundlaugar verða áfram lokuð eftir 4. maí og ekki er vitað hvenær gera má ráð fyrir að þau opni aftur.  Hins vegar verða íþróttaæfingar barna og unglinga leyfðar í smærri hópum eftir 4.maí og munu koma frekari leiðbeiningar um það fljótlega.

Rætt er um að slakað verði á heimsóknarbanni á hjúkrunar- og dvalarheimilum en ekki eru komnar reglur/leiðbeiningar um hvernig það verður útfært.  Við munum senda frá okkur tilkynningu þegar þær leiðbeiningar liggja fyrir.

Ég tek undir með þríeykinu Víði, Þórólfi og Ölmu um að aflétting haftanna hefst 4.maí og sá dagur er ekki kominn.  Við verðum að halda áfram að virða þær reglur samkomubanns sem nú eru í gildi. Við þurfum líka að halda áfram að þvo vel hendur, spritta og virða fjarlægðarmörkin. Okkur hefur gengið vel í baráttunni en verkefninu er ekki lokið, við þurfum að halda áfram að standa okkur vel.

Í gær komu fram tilmæli frá Almannavörnum til okkar sveitarfélaganna þar sem við vorum hvött til að brýna foreldra um að börn og ungmenni væru ekki að safnast saman á leiksvæðum en borið hefur á því að t.d. börn hafi verði fjölmenn á sparkvöllunum m.a. hér hjá okkur.  Þetta er  stranglega bannað og afar mikilvægt að foreldrar brýni það fyrir börnum sínum.

Ég veit að þetta er ekki auðvelt, sérstaklega ekki nú þegar vorið er að koma og sólskinsdagar láta sjá sig. En þessi veirufjandi spyr ekki að því og við verðum að finna leiðir til að njóta veðurs og náttúru án þess að hópast saman. Við getum þó glaðst yfir því að þurfa ekki að sæta útgöngubanni eins og fjöldi fólks í öðrum löndum býr við.

Það er reyndar mjög ánægjulegt þessa dagana að sjá sannkallaðan vorboða í öllum þeim mikla fjölda fólks í Snæfellsbæ sem sinnir sinni hreyfingu utanhúss þessa dagana sér til heilsubótar. Það er til mikillar fyrirmyndar enda skiptir hreyfingin og útiveran öllu máli bæði til að viðhalda líkamlegri heilsu en ekki síður og kannski enn frekar þeirri andlegu. Ég hvet okkur því öll til að halda áfram á þessari braut okkur til heilsubótar á skrýtnum tímum

Enn og aftur vil ég ítreka þakkir mínar til alls þess fólks sem hefur lagt á sig mikla vinnu, við erfið skilyrði, til þess að samfélagið okkar geti gengið jafnvel og það gengur.  Það er svo magnað að upplifa þessa tíma og finna samstöðuna og samkenndina í samfélaginu bæði hér í Snæfellsbæ og líka á landinu öllu. Það er líka svo magnað að sjá aðlögunarhæfnina og finna kraftinn og útsjónarsemina hjá fólki í störfum hjá bænum og úti í fyrirtækjunum sem finnur nýjar leiðir þegar aðrar lokast vegna ástandsins.

Við munum komast í gegnum þennan ólgusjó og við gerum það saman. Ég hvet íbúa til að halda áfram að standa saman og standa með okkar fólki. Áhrif faraldursins eru mikil á mörg fyrirtæki í okkar bæjarfélagi eins og annarsstaðar. Það eru því fjölmargir sem búa nú við óvissu, óöryggi og afkomuáhyggjur. Við getum lagt okkar af mörkum með því að versla heima og styðja okkar fólk.

Höldum í gleðina, jákvætt hugarfar skiptir alltaf miklu máli og nú sem aldrei fyrr. Vorið er framundan með öllum sínum töfrum og ég ætla að leyfa mér að trúa því að á eftir fylgi sólríkt og gott sumar. Ég ætla að enda þennan pistil minn í dag á fallegu ljóði um vorið eftir Jónas Hallgrímsson.

Vorið góða, grænt og hlýtt,
græðir fjör um dalinn,
allt er nú sem orðið nýtt,
ærnar, kýr og smalinn.

Kveður í runni, kvakar í mó
kvikur þrastasöngur;
eins mig fýsir alltaf þó:
aftur að fara’ í göngur.

Kristinn Jónasson, bæjarstjóri

Ólafsvíkurvaka 2019.

Í tilkynningu frá Almannavörnum, sem send var á sveitarfélög í dag, 16. apríl, segir að borið hafi á því að unglingar hópist saman á leiksvæðum að kvöldlagi og sé ástæðan líklega gott veður og þær jákvæðu fréttir sem hafa verið að berast af þróun mála í baráttunni gegn COVID-19. Það sé aftur á móti mjög mikilvægt að sofna ekki á verðinum og sporna gegn hópamyndun til að framfylgja smitvörnum.

Þó erfitt kunni að reynast að framfylgja öllum fyrirmælum nú þegar mestu óvissuþokuna af COVID-19 er farið að létta þurfa foreldrar, forráðamenn og aðrir íbúar í Snæfellsbæ að hjálpast að til að sporna gegn hópamyndun unglinga. Öll viljum við skemmta okkur saman á ný, sbr. meðfylgjandi ljósmynd frá Ólafsvíkurvöku í fyrra, og öll þurfum við að standa saman þar til ástandið lagast og höftum verður aflétt.

Þó svo virðist sem dregið hafi úr COVID-19 smitum á Íslandi og umræða sé hafin um það hjá stjórnvöldum hvernig slakað verði á þeim höftum sem sett hafa verið er rétt að minna á að enn hefur ekki verið dregið úr þeim ráðstöfunum sem hafa verið í gildi. Núverandi reglur um samkomubann eru enn í fullu gildi sem og allar almennar varúðarráðstafanir.

Töluverðar takmarkanir eru þannig enn í leik- og grunnskólum og strangar kröfur settar um fjölda og nálægð nemenda til að takmarka krosssmit. Þessar takmarkanir hafa reynst vel og engin smit borist í skólana okkar. Skólafélagar sem eru ekki í sama hópi í skólastarfi ættu ekki að vera í návígi utan skóla, æfingar eru enn óheimilaðar o.s.frv.

Hópamyndanir að kvöldlagi eru því eðlilega enn óheimilaðar.

Fyrsta smit af völdum kórónaveirunnar COVID-19 hefur nú greinst í Snæfellsbæ. Rakningarteymi á vegum almannavarnadeildar ríkislögreglustjóra og sóttvarnalæknis hefur nú tekið við og mun hafa samband við þá sem hafa verið í návígi við viðkomandi einstakling.

Í ljósi útbreiðslu veirunnar um heimsbyggðina var í raun bara tímaspursmál hvenær, ekki hvort, fyrsta smitið yrði greint hér í Snæfellsbæ. Ekki er ósennilegt að fleiri smit greinist hér á næstu dögum og vikum.

Þegar smit greinist fer af stað ákveðið ferli sem stýrt er af sérfræðingum. Við fylgjum þeim í hvívetna og biðlum til íbúa að gera það líka.

Við ítrekum og áréttum mikilvægi þess að íbúar haldi áfram að fylgja fyrirmælum og leiðbeiningum sóttvarnarlæknis og rétt að minna íbúa á að fylgjast vel með fréttaflutningi og öðrum tilkynningum frá Snæfellsbæ.

Við komumst í gegnum þetta verkefni sem samfélag með því að standa saman, sýna virðingu og góðvild hvert við annað og með því að gera það sem fyrir okkur er lagt af yfirvöldum.

Viðvera atvinnuráðgjafa Samtaka sveitarfélaga á Vesturlandi taka mið af aðstæðum í samfélaginu og fara nú eingöngu fram í gegnum síma eða fjarfundarbúnaðinn Zoom. Um tímabundna ráðstöfun er að ræða.

Atvinnuráðgjafi hér í Snæfellsbæ verður því ekki með viðveru í ráðhúsi Snæfellsbæjar 7. apríl og 5. maí 2020 eins og skipulag gerði ráð fyrir.

Ráðgjafar SSV fylgjast grannt með framvindu mála á þessum óvissutímum og geta aðstoðað, veitt ráðgjöf og miðlað upplýsingum til fyrirtækja og rekstraraðila á Vesturlandi.

Hægt er að hringja í atvinnuráðgjafa hér í síma 895-6707 og bóka fjarfund eða ræða málin símleiðis.

Atvinnuráðgjafi SSV í Snæfellsbæ:

Helga Guðjónsdóttir
Atvinnuráðgjafi
Sími: 895-6707
Netfang: helga@ssv.is

Nánar má lesa um hlutverk atvinnuráðgjafa á vefsíðu SSV.

Ágætu íbúar.

Áfram höldum við þessu óvenjulega ferðalagi á fordæmalausum tímum heimsfaraldurs. Vikurnar líða hver af annarri með nýjum covid-verkefnum og öll tilveran er breytt.

Í dag föstudaginn 3. apríl er staðan sú að enginn hefur verið greindur með Covid-19 í Snæfellsbæ. Það eru góðar fréttir. Á Vesturlandi eru smitaðir 32 og í sóttkví á Vesturlandi eru nú 324.  Hér á Snæfellsnesi hafa greinst smitaðir 4.

Nú er okkur mikilvægt sem aldrei fyrr að haga okkur skynsamlega, fara eftir þeim tilmælum sem fyrir okkur er lögð og vil ég enn og aftur hvetja íbúa til að lesa það sem bæjarfélagið hefur sett á heimasíðuna www.snb.is varðandi covid-19.

Grunnskólinn og tónlistarskólinn eru nú komnir í páskafrí og vil ég nota þetta tækifæri til að þakka stjórnendum, starfsfólki, nemendum og foreldrum innilega fyrir þeirra framlag til þess að skólinn gæti starfað.  Það hefur verið flókið skipulag en með samtakamættinum hefur það tekist.

Nú framundan er páskafríið sem hefur verið mikill ferðatími Íslendinga.  Víðir Reynisson hefur að því tilefni biðlað til okkar allra um að hugsa um það að veira hagar sér eins á virkum dögum og á hátíðum.  Á páskum ætti því almenningur að halda sig heima, ferðast innanhúss eins og það er kallað nú.  Ekki er ráðlagt að ferðast mikið um landið bæði vegna veirunnar og einnig vegna þess að álag á heilsugæslur og sjúkrastofnanir víða um land er þegar mikið og ekki má á það bæta slysum sem auðvitað eru fylgifiskur aukinna ferðalaga.  Einnig er mikilvægt að huga að innkaupum í tíma fyrir hátíðirnar þannig að álagið dreifist. Það má líka minna á það að gott er að nýta hverja verslunarferð vel og reyna að fara sjaldnar í búð en áður. Þegar farið er í búð skulum við muna eftir umgengnisreglum, spritta og halda 2 metra fjarlægð við næsta mann.

Við eigum að fara eftir þessum tilmælum öll sem eitt og getum þannig lagt okkar af mörkum til þess að heilbrigðiskerfið að ráði við það stóra verkefni sem nú er í gangi.

Við þökkum fyrir hvern dag sem við erum smitlaus hér í Snæfellsæ. Ég á þó von á því að smit berist hingað, það er bara spurning hvenær.  Það er nú samt þannig að við getum með samhentu átaki gert okkar til að sem fæstir smitist og að áhrifin verði þannig sem minnst. Við þurfum að standa saman sem aldrei fyrr og sýna ábyrgð.

Það er líka mikilvægt að allir hugi vel að heilsunni og ekki síst að heilsu barna og unglinga. Það er um að gera að fara í gönguferðir og leiki og nota tímann heimavið til að gera eitthvað skemmtilegt sem létt getur lundina.  Ekki skortir okkur fallega náttúru sem er hér við hvert fótmál og nóg pláss fyrir alla. Nú er um að gera að fara á þá staði sem fólk hefur lengi langað að skoða en slegið á frest og líka að skoða þá uppáhaldsstaði sem alltaf hafa heillað.

Sýnum tillitsemi, náungakærleik og umhyggju innan þeirra fjarlægðamarka sem okkur eru sett. Það er gaman að sjá útsjónarsemi fólks í góðmennskunni, nú síðast kallaði framtak nemenda og kennara sem sungu fyrir utan Jaðar fram bros hjá mér og örugglega öllum öðrum.

Mig langar um leið og ég óska ykkur öllum gleðilegra páska að enda þennan pistil á fyrsta erindi sálmsins Dag í senn eftir hr. Sigurbjörn Einarsson biskup sem mér finnst afar fallegur og hefur verið hughreystandi fólki í ýmsu andstreymi, góða helgi.

Dag í senn, eitt andartak í einu,
eilíf náð þín, faðir gefur mér.
Mun ég þurfa þá að kvíða neinu,
þegar Guð minn fyrir öllu sér?
Hann sem miðlar mér af gæsku sinni
minna daga skammt´ af sæld og þraut,
sér til þess, að færa leið ég finni
fyrir skrefið hvert á lífs míns braut.

Kristinn Jónasson, bæjarstjóri