Skip to main content

Íbúar á Snæfellsnesi hamingjusamastir samkvæmt stórri könnun

Búseta á Snæfellsnesi skorar hátt hjá íbúum á svæðinu. Ljósmynd: Silja Sigurðardóttir.

Íbúar á Snæfellsnesi reyndust hamingjusamastir og marktækt hamingjusamari en á öðrum svæðum landsins samkvæmt nýrri könnun á vegum Byggðastofnunar og landshlutasamtakanna, sem mældi búsetuskilyrði, hamingju og almennt viðhorf til búsetusveitarfélags.

Íbúar á Snæfellsnesi voru jákvæðastir í afstöðu til síns sveitarfélags og gáfu ásýnd hæstu einkunn allra og voru einnig ánægðir með loftgæði, sorpmál, umferðaröryggi og umhverfismál.

Skoðanakönnunin var gerð í september og október 2020 og var send út á þremur tungumálum, íslensku, ensku og pólsku. Rannsóknamiðstöð Háskólans á Akureyri annaðist gerð úrtaks. Vífill Karlsson, hagfræðingur hjá Samtökum sveitarfélaga á Vesturlandi, hafði yfirumsjón með skipulagi og framkvæmd.

Niðurstöðurnar byggja á svörum frá yfir tíu þúsund þátttakendum og er þetta í fyrsta sinn sem svo víðtæk könnun á búsetuskilyrðum, hamingju og viðhorfi til sveitarfélags nær til allra svæða landsins.