Íbúar Snæfellsbæjar eru duglegir við að gera sér glaðan dag og leika sér, sama á hvaða aldri þeir eru. Sundíþróttin er í heiðri höfð og ungir sem aldnir njóta þess að sundlaugar eru í Ólafsvík og á Lýsuhóli, en þar er mjög vinsæl náttúrulaug.

Hjólreiðar og hjólreiðakeppnir, gönguferðir, þorrablót, dansleikir, kórastarf og ýmis konar félagsstarfsemi blómstrar, með virkri þátttöku þeirra sem í bæjarfélaginu búa. Hið vinsæla Snæfellsjökulhlaup, krefjandi og skemmtilegt hlaup yfir Jökulháls frá Arnarstapa yfir í Ólafsvík, er alltaf haldið fyrstu helgina í júlí.

Í Snæfellsbæ er jafnframt rekið atvinnumannaleikhús í Frystiklefanum á Rifi og þar eru reglulega settar upp nýjar sýningar sem laða til sín áhorfendur víða að.