Snæfellsbær eflir stafræna þjónustu með íbúagátt og rafrænum umsóknum

Snæfellsbær bætir stafræna þjónustu við íbúa og tekur í notkun íbúagátt. Íbúagáttinni er ætlað að auka sjálfvirkni og gagnvirkni í meðferð mála og erinda fyrir íbúa Snæfellsbæjar og hagkvæmni í rekstri. Snæfellsbær hefur einnig tekið í notkun OneLand Robot, rafrænt umsóknar- og afgreiðslukerfi fyrir umsóknir um byggingaráform og byggingarleyfi. Hönnuðir eða eigendur geta nú með auðveldum hætti sent inn rafrænar umsóknir, tilnefnt hönnunarstjóra, byggingarstjóra og iðnmeistara og þeir hinir sömu staðfest sig á verk. Allt ferlið er rafrænt þar sem allar aðgerðir eru staðfestar með rafrænum skilríkjum í farsíma.

Rafrænar umsóknir byggingarfulltrúa eru nú þegar komnar í gagnið í íbúagáttinni og eingöngu verður tekið við rafrænum umsóknum frá og með deginum í dag. Unnið er að því að færa inn eyðublöð og umsóknir í öðrum málaflokkum.

Hlekkur á íbúagátt er aðgengilegur á forsíðu Snæfellsbæjar og fólk skráir sig inn með rafrænum skilríkjum.

Hlekkur:

• Íbúagátt Snæfellsbæjar